教你濕泥賽搵好馬

猪拉多纳

　　每逢落大雨跑泥地賽，通常都會出現爆冷現象，因一些向來未有佳處可言的賽駒，無端端上身闖入三甲，投X了這些場合的馬迷大多輸得焦頭爛額。輸錢冇人想，賽後大罵「最衰都係落雨搞亂檔」是理所當然。然而，我卻認為一時勝敗其實不是太重要，最緊要是識從中發掘下次的投X重心。

　　濕慢泥地之所以易爆冷，是因為場地偏差大得誇張，若然實力馬的跑法不符合場地屬性，交不出應有水準絕對唔奇。根據我的經驗，濕慢泥地向來大利放頭馬，上周六之三場泥地1200米亦不例外，三匹頭馬都是一早跟在前面，賺盡形勢，但牠們下次回到正常泥地能否再贏？我認為比較難。反而，若果能於濕慢泥地交出追勁，縱使該役與頭馬相隔甚遠，亦有可能是好貨色。

　　上周六能夠在泥地賽交出強橫追勁的馬匹只得幾匹，頭場「好爽趣」是其中之一，這匹中距離馬突然縮程跑1200米，早段當然會慢，但入直路後卻奮力追趕，爆出全場最快末段23秒81，下次回到正常泥地賽，隨時有力贏甩對手。

　　另一匹是第四場「紅褲仔」，表面上，此駒輸了十一個馬位，但牠跑法不合之餘，更要拉出大外叠追趕，唔輸就奇，惟中段追勢誘人，下次再出仍要追。(洋超)