潘頓四、六場要捧

猪拉多纳

　　雷神不斷進逼，韋達又有回起之勢，潘頓唔係幾定檔，爭騎師冠軍可能有暗湧，好彩佢深明龜兔賽跑道理，冇話因為帶離10場以上，就闊佬懶理放鬆心情，反而，近日攻勢一浪接一浪。

　　今晚撞正佢嘅眼中釘莫雷拉停賽，仲唔係潘頓數胡大好良機，呢一晚佢同韋達大家都係騎足8場，坐騎實力各有千秋，不過，睇埋馬會騎師王賠率，潘頓噚日中段賠率1.6倍，韋達居然係3.2倍，兩者賠率太懸殊，睇嚟真係有啲玄機，唔通韋達今晚會「直通車」收場。

　　既然潘頓賠率合理，佢啲馬自然要嘜到實，但有8場點揀好？我認為第四、六場最好買，除咗因為佢騎方廐熱門馬比較醒定之外，近期潘頓跑谷草1650米，唔係同你講玩。

　　頭馬多來自方廐

　　就在四月，潘頓一共有10駒跑谷草1650米，獲得5冠1季2殿，贏馬比例有50%，百分率勁到咁，堪稱路程專家，而當中大部分「溫拿」都係來自方嘉柏馬房，所以，呢晚「紅簿仔」同埋「天合」點可以唔捧場。

　　(Jack)