維拉新星射爆作客蟲史篤城

猪拉多纳

今晚英超壓軸戰上演阿士東維拉主場對史篤城，咪以為兩支中游球隊冇乜好爭，查實大家仲要爭取盡快去到40分呢個護級分水嶺。維拉今季一班「二字頭」生力軍諸如賓迪基、巴根拿等進步神速，愈踢愈醒神，撞正今季客場腳軟嘅史篤城，1.98倍主W應該開得出啦！

（now621台周一凌晨0:00直播）
史篤城客場15戰得1勝

維拉同史篤城目前同得34分，不過維拉就打少場兼憑較佳得失球排第10，過往英超普遍有個觀念，就係拎夠40分就可以提早護級成功，唔想夜長夢多，今晚兩班波都會搏命。不過，唔係話搏就會贏得，好似史篤城今季客場15戰竟然只得1勝，合共拎得7分係全英超第2差，自從舊年8月尾作客贏過韋斯咸後，到依家都未再W過，今晚去到維拉公園，點捧得落手？

更大鑊係，史篤城今仗會有前鋒約拿芬禾達斯同中場重心查理阿當停賽，艾利蘭又話合約問題唔出得，加埋後防重心賀夫已經提早收咧，頂替嘅派達斯又有傷，陣容不整點去搶分先？

維拉呢邊，今季表現不過不失，不過佢哋個進攻鐵三角就認真搶鏡。只得23歲嘅賓迪基今季入咗9球，射術出色，仲有22歲仔荷蘭中場巴根拿同上場射爆車仔嘅24歲中場戴爾夫，都係上位中嘅明日之星，有佢哋撐場，要攻陷史篤城唔難啦！

仲有一點，原來維拉近期主場兩連勝，已經係近3年半以來首次，家陣佢哋為求取得自07年10月以來首次主場3連勝，內部士氣不知鬼咁好，今仗梗係不勝無歸啦！