莫連奴玩低調夠高招

猪拉多纳

貴為歐洲頂級主帥，莫連奴憑住過往彪炳戰績，甚少惹嚟球迷質疑，就算佢今季重返車路士後，一反常態示人以弱，不斷向競爭對手曼城大笠高帽，都被視為向勁敵施壓嘅心理戰。

點解莫連奴重返英超之後變得低調？Peter嘅睇法係一來現時英超競爭空前激烈，前四位球隊分數相當接近，邊隊稍一不慎就被趕過頭，情況與莫連奴當年一上任車仔主帥即奪雙料冠軍嘅環境截然不同。二來莫帥最信得過嘅舊部如泰利、林柏特、艾殊利高爾皆年華老去，再唔係藍戰士嘅重心所在，技術細膩嘅夏薩特、奧斯卡杜斯山度士等與莫連奴嘅戰術磨合需時，再加上陣中亦有一批並非其屬意嘅班底，在這些不明朗因素之下，莫帥向外認低威，免成大眾焦點、敵軍嘅眼中釘，專心着眼未來實為一個上策。

話雖如此，查實車仔唔聲唔聲已殺上聯賽榜首，多賽一場下領先緊隨其後嘅利物浦及阿仙奴7分。當然，目前排第4落後9分嘅曼城實質比車路士踢少3場比賽，亦絕對有力從後趕上，因此Peter相信莫連奴會繼續其低調作風。
舒活執教功力有限

相反，倫敦另一大球會熱刺季中提拔舒活代替保亞斯接掌兵符，一度有番啲起色，獲得解凍嘅箭頭艾迪巴約更頻有士哥，令球迷開心好一陣子；不過英倫教頭嘅思維、心理質素及戰術部署，始終與歐洲大陸頂級主帥嘅水平有一段距離，當蜜月期過後，舒活嘅執教料子便逐漸見底，不能單靠士氣去維持成績。熱刺接連於聯賽及歐霸失利，大軍再次陷於死寂，球隊有否能力再次彈起暫時冇人知，但呢幾場比賽已經反映出舒帥功架有限。
金句：莫連奴同舒活的日與夜