哥本哈根主場博大霧

猪拉多纳

爭踢歐霸焗攻皇馬

B組另一仗由皇家馬德里作客丹麥嘅哥本哈根，雖然皇馬已鐵定首名出線，但球隊上仗西盃對住丙組仔竟然贏唔到，真係勁失威，今場定會狂攻對手以求出氣，而哥本哈根雖然無望出線16強，但為爭小組第3踢歐霸盃，今場同樣會主攻爭勝，捧入球大啱數。

（周三凌晨3時45分開賽）
C朗巴利隨時候命

皇馬上場喺西班牙盃對住丙組仔奧林比薩維亞竟然悶和0比0，冇咗C朗同加里夫巴利好似廢晒武功，即使迪馬利亞、賓斯馬等球星落場，但踢極都入唔到波，認真羞家，所以皇馬今仗希望以一場大勝嚟挽回面子，而且一對天價雙翼C朗同巴利已從傷病中康復，今仗隨時候命，皇馬有番呢兩位球星孭飛，入波冇難度。再者，皇馬喺分組賽踢咗5場波入咗18球，係歐聯32隊中入波最多嘅一隊，火力驚人，今仗對手哥本哈根又係同組最弱，應該又係時候數胡。

喺B組排包尾嘅哥本哈根雖已出局，但同排第3嘅加拉塔沙雷同得4分，今場贏波就有得升上第3攞到踢歐霸盃資格，如果和波就要加拉塔沙雷輸畀祖記先至有得傾，與其等運到，不如自己掌握主動權，所以今場為爭勝實會同皇馬死過，兩軍進攻意欲都咁旺盛，大盤有計。