巴西邁阿密洩洪

猪拉多纳

當足球巨人遇上二流老散

巴西空降美國邁阿密踢熱身賽，今次約埋中美洲二線球隊洪都拉斯拍跳，「森巴兵團」教頭史高拉利重召箭頭羅賓奴入伍，提醒隊內將士唔好以為自己肯定有份打世界盃，呢場由弗爆射手尼馬領軍嘅太公波，肯定成巴西眾星大騷哥利嘅場合，洪都拉斯實力同巴西呢個「足球巨人」差好多班，今次「朝聖」預咗進貢大量入球，熱捧巴西讓球主勝！

（TVB301周日早上8時30分直播）
尼馬領軍全力盡數

史高拉利今次點兵大部分球員都熟口熟面，最大驚喜係搵返羅賓奴，呢位AC米蘭球星闊別國家隊兩年之久，史帥話羅賓奴係萬能攻擊手，希望佢爭氣啲交足功課。評論認為羅賓奴入選全因巴西喺「迪亞高哥斯達爭奪戰」不敵西班牙，但呢位巴打難得再獲徵召，肯定搏晒老命爭取表現。「大飛」仲透露自己一直有留意卡卡喺AC踢成點，潛台詞係叫隊內球員醒醒定定，真係高招！

巴西貴為5屆世界盃冠軍，陣容星光熠熠，箭頭尼馬係星中之星，佢今年喺洲際國家盃大放異彩，去到巴塞隆拿極速融入球隊，鋒頭直逼阿根廷球王美斯，真係唔簡單！巴西前線仲有大舊中鋒侯克及祖奧等射得之人，進攻火力超強大，另中後場車路士一門四傑奧斯卡杜斯山度士、韋利安、拉美利斯同大衞雷斯悉數入選，成為森巴兵重力戰力，因此即使左閘馬些路受傷退隊都影響不大，加上呢班球星個個明年都想喺自己地頭出戰世盃，難得遇着隊唔係咁強嘅洪都拉斯，絕對唔會放過對手，力求盡數博取「大飛」歡心。
洪都拉斯越級挑戰

洪都拉斯唔少主將於英格蘭搵食，守將美羅費古羅亞、中場柏拉西奧斯及羅渣艾斯賓路沙全部都實而不華，不過佢哋始終只係中北美洲二線球隊，其餘位置嘅球員級數未夠，面對實力頂級嘅巴西肯定全場捱打，即使死守都難逃大敗厄運，巴西大把貨，雖然讓得辣，但照捧讓球勝！