國足「恒大撐腰」撲擊印尼

猪拉多纳

「恒大勢力」撲擊印尼！亞洲盃外圍賽今晚戰火重燃，擁有9位廣州恒大（足智彩譯FC廣州）主將嘅國足會喺西安主場恭候印尼。國足唔單止學埋恒大出動海報攻勢，仲呼籲中超列強巨頭入場做應援團，面對黑過墨斗嘅印尼可秤先，讓2球照捧1.75倍「讓球主勝」。

（中央5台周五晚7:35直播）
黑仔印尼滯留機場

位處C組嘅國足暫時揸住4分排第2，落後「一哥」沙特阿拉伯5分，今鋪對住全組實力至削嘅印尼當然不容有失。國內班霸恒大喺亞冠奪標過程當中，多次印海報造勢，估唔到國足都有樣學樣，日前發布以「戰鬥」為主題嘅宣傳海報激勵球員，就連鄭智都話「國家隊賽事比球會賽事更重要」，睇得出全隊上下鬥志十足。

中國足協已經邀請中超列強班主同教練入場打氣，當中恒大教練納比已答應到場，以鄭智同郜林為首嘅9位恒大重心，仲帶埋球會御用軍醫去西安添，勁重視今場波喎！

之所以話印尼黑過墨斗，皆因佢哋早排明明約戰北韓球隊4月25日踢兩場友賽，但對方突然變卦只係踢1場，嚴重影響部署。跟手印尼由平壤飛赴中國，又因簽證問題搞到全體球員滯留北京首都機場，加埋尼日利亞歸化前鋒尼禾高路因傷肯定缺陣，黑仔成咁隨時輸鑊勁都似！