雙藍會情仇大激鬥

猪拉多纳

兩代「艦長」英倫冤家路窄

英超今晚上演矚目「雙藍會」，「藍戰士」車路士主場迎擊「藍月亮」曼城，兩個前「銀河艦隊」皇家馬德里教頭喺英倫碰頭，車仔教頭莫連奴曾公開批評曼城主帥比歷連尼為失敗者，今次仇人見面，唔係唔出招羞辱對方啊！兩軍攻擊球員上晒力，齊齊搏殺鬥士哥，投X首選大盤！

（now 621周一凌晨零時直播）

曼城教頭比歷連尼喺09至10季度接掌皇馬，當年狂燒2億鎊簽下C朗及卡卡等巨星，最終得個吉，翌季即被莫連奴取代。而當時莫帥上任後仲要鞭屍，直指上手主帥比帥係失敗者，都去得幾盡吓。比歷連尼及後去到馬拉加，莫連奴仍然窮追猛打，把口完全唔收，今次兩位名帥轉移陣地喺英超再次過招，相信將會擦出新火花。
車仔曼城射手當弗

車路士開季以來最大問題係前鋒冇料到，經過莫連奴調教後，伊度奧狀態已有起色，上周聯賽對卡迪夫城都有士哥，而另一位箭頭費蘭度托利斯更喺上場歐聯梅開二度，睇落有番當年七成功力。車仔最大喜訊係進攻重心夏薩特都弗番，對上三戰入四粒，呢個比利時球星係上季球隊靈魂人物，只要佢踢得順，唔愁冇士哥。
藍月亮穿窿8連大

曼城射手阿古路近期狀態都係「箭嘴向上」，近三場轟入五球，處於全季最弗時期，佢個拍檔尼格度都愈踢愈生，搞到迪斯高暫時被冷落。曼城就係勝在人多，隊內球星輪住發功，相當難對付。不過，大軍防線重心及隊長高柏尼仲要養傷，後防穿咗個大窿，頂唔住車仔猛攻。曼城連開八口大，車仔亦已四連大，再追多場啦！

莫連奴 車路士領隊：我哋會踢番自己家波睇吓夠唔夠贏！贏波好，輸波就唔好，依家英超競爭激烈，一場戰果唔會決定一切。

比歷連尼 曼城領隊：呢場波梗係重要啦，遇上一支爭標熱門球隊必定係大戰，今場絕對係硬仗，若果想贏波就要踢得好好！