意甲有直播 睇羅馬嬴「玻」

猪拉多纳

意甲終於有直播！今晚「打頭陣」嘅係榜首大戰，由「1哥」羅馬主場火併「老二」拿玻里！羅馬「小狼隊」踢出令人意想不到嘅高水平，開季7戰全勝，雖則拿玻里嘅「狂牛革命」同樣唔差，但後防主力養傷大執位，好難頂得住「雌狼」。羅馬讓平半，力奇捧1.89倍上盤！

（TVB 13及now818台周六凌晨2:45直播）

同樣位處意大利南部嘅羅馬同拿玻里，兩地經常陽光燦爛，所以每次碰頭都有「太陽打吡」嘅外號。事實上，羅馬今季嘅演出就好似旭日初升咁，幾位90後小將包括費奧倫斯同史杜特文都穩佔正選一席，連繫攻守表現搶鏡。同時，塞爾維亞新星拿積雖然多以後備身份上陣，但都累積咗3個入波，呢班「小狼」實力唔講得笑。
羅馬7戰全勝喪轟20球

羅馬今季除咗班新星爭氣，經驗豐富嘅「老王子」托迪依然寶刀未老，最緊要係啱啱嘅國際賽期仲可以畀佢抖抖回氣，加埋2個英超棄將謝雲奴同馬爾干嚟到「雌狼」齊齊翻生，家陣呢班波7戰全勝，轟入20球只失1球，氣勢勁到冇朋友，今晚主場出擊梗係撐得過啦！
「雌狼」請馬納當拿入場睇波

拿玻里呢邊，亦有西班牙籍新帥賓尼迪斯策動「狂牛革命」，今季買入嘅西班牙兵諸如連拿、艾比奧爾、荷西卡利祖，以至由皇馬加盟嘅阿根廷兵希古恩都交到貨，開季至今6勝1和同樣巴閉。不過，佢哋今晚卻有「一籃子」危機，助攻助守踢到曉飛嘅左閘辛尼加打柴、中堅艾比奧爾又話有傷上陣成疑，哥倫比亞中堅保羅艾美路喺世盃外搏完命後，尋日先歸隊，加上下周有歐聯後顧之憂，作客真係信唔過o架！

值得一提，上季冇直播嘅意甲，等到依家終於搞掂個轉播權，頭炮即刻有好戲益大家。咁啱得咁蹺，羅馬今仗仲趁住阿根廷球王馬納當拿尋晚去咗米蘭市攞獎，因利成便，畀錢出埋機票同車去接呢位經典拿玻里英雄嚟做座上客，各位球迷到時可以透過電視機，一睹佢嘅風采啦！