英格蘭勢破殘陣黑山

猪拉多纳

贏晒兩場就可以去巴西

世界盃外圍賽歐洲區H組賽事，英格蘭主場對黑山，今場勝負關乎呢組出線席位，名副其實係關鍵「六分波」。黑山賽前有大批主力受傷，包括隊長胡仙歷，殘陣出擊令人擔心。英軍只要贏晒餘下兩場比賽就唔使睇人面色，確保直接出線資格，鬥志鮮明，由近期狀態弗到漏嘅史杜列治夥拍朗尼攻堅有力大勝，蘇豪推介「讓球主勝」。

（now 621周六凌晨3時直播）
胡仙歷因傷缺陣

H組目前形勢緊湊，榜首球隊英格蘭有十六分在手，次席烏克蘭及第三位黑山各得十五分，連第四位嘅波蘭有十三分都仲未斷氣，四隊差距不大，競爭非常激烈。黑山暫時稍處下風，今戰必須贏波先可以反先對手，作客都要全力爭勝。不過黑山現時深受傷兵問題困擾，隊長胡仙歷受傷肯定缺陣，雖然前線仲有丹恩奴域及祖維迪等幫手，但攻力點都要打折扣。與此同時，守將巴沙及門將保素域亦受傷，人腳嚴重不整，形勢並不樂觀。

英格蘭今場主要缺少阿仙奴射手禾確特，呢位快翼仍然養傷未有入選，大軍將倚重曼聯射手拍檔朗尼及韋碧克，加埋弗到漏油嘅利物浦箭頭史杜列治，進攻火力唔弱。門將赫特近期喺曼城不時出現甩漏情況，但主帥鶴臣表明會繼續畀信心呢位頭號門神，可望穩定軍心。同時間鶴臣亦召入巴克里及安祖斯唐辛等小將，兩人今季喺球會表現突出，有力成為奇兵，人手調配唔成問題，只要發揮應有水準，贏面仍然較高。
全和往績信唔過

翻查往績，自黑山「獨立」以來，兩隊三次碰頭，全部打成平手，反映雙方實力頗為接近。不過，英軍今戰擁有主場之利，人腳比對手完整，形勢佔上風，而且目前佢哋掌握出線主動權，戰意夠晒鮮明，就算領先都唔會只求保住勝局，進取啲可博埋「讓球主勝」。