薩克達主降魔

猪拉多纳

莫耶斯打大賽冇料到

將軍一去，大樹凋零！曼聯自從費格遜退休後，阿占就有呢種「凋零」嘅感覺，唔係話莫耶斯唔好，但要從未帶過大球會嘅佢掌管「紅魔王朝」，「爭標」、「歐聯」呢啲字對佢都係非常陌生，今晚曼聯喺A組作客歐聯常客薩克達，莫耶斯隨時又要上殘酷一課，捧薩克達2.22倍主勝唔過分！

（有線61及201周四凌晨2:45直播）

曼聯今季表現大跌WATT，對住利物浦、車路士同曼城未逢一勝，莫耶斯打大賽嘅能力難免受到質疑，雖然歐聯首仗贏咗利華古遜，但今場遠征烏克蘭，絕對係佢哋分組賽最惡打嘅一仗，對於歐聯經驗不足嘅莫耶斯嚟講，喺排陣同臨場調動方面難免會有失誤，唔通尹佩斯同朗尼真係萬能到做埋佢嗰份咩？
薩克達升呢烏克蘭一哥

今年已經係薩克達連續第4年踢歐聯，無疑佢哋已取代基輔戴拿模成為烏克蘭代表球隊，2011年試過打入8強，上屆亦成功躋身16強，絕對係支實力一流嘅球隊，大家唔善忘嘅話，應該記得佢哋上屆主場2:1贏過車路士，最後仲將「藍戰士」喺分組賽踢出局嘅風光。

以巴西球員為主嘅薩克達，今個夏天雖然放走米希達利恩同費蘭甸奴兩大主力，但佢哋亦一口氣簽咗4個巴西球星同1個阿根廷球星，包括2,200萬鎊羅致巴西新進國腳班納特安尼斯奧，呢位21歲小將加盟前捧完南美自由盃，而且一嚟就獲分配10號波衫，大家認真要睇實呢位明日之星呀！
歐聯A組

頂占筍盤：薩克達（主勝）