愛華頓拆「妞」話咁易

猪拉多纳

客軍傳換帥軍心大亂

今晚「英超星期一」值得捱眼瞓捧場，愛華頓喺主場對紐卡素，吼實1.52倍主勝。雖然紐卡素近況唔曳，不過英國傳媒話，迪馬堤奧拒絕執教新特蘭，其實係收到風紐卡素即將炒領隊等住見工，咁嘅情況，試問「喜鵲」班球員點集中精神比賽呀？

（now621台周二凌晨3:00直播）

愛華頓走咗領軍風格沉悶嘅領隊莫耶斯，同埋「爆炸頭」費蘭尼，原本令人覺得會冇咁穩，點知新教頭馬天尼斯上任後開季連續6場不敗，甚至試過喺聯賽以1:0打沉車路士，直至上星期喺聯賽盃作客以1:2不敵富咸，先至首次輸波，難怪韋斯咸領隊艾拿戴斯都話，依家愛華頓仲勁過以前，就算有干尼、派拿、奧士文同艾卡拉斯養傷都唔使驚。
迪馬堤奧隨時接手

事實上，紐記陣中傷兵都唔少，包括艾美奧比、約拿斯古迪利斯同賴恩泰萊，近5場有4勝1負嘅背後充滿危機。仲有呀，上季馬天尼斯帶最終降班嘅韋根，都曾經喺主場以2:1砌低紐卡素，今季佢執教級數較高嘅愛華頓，又點會怕對方。

最重要係，英國傳媒話新特蘭想搵迪馬堤奧領軍，點知畀佢拒絕咗，理由係佢覺得紐卡素更加啱佢，即係話佢收到風，柏杜隨時畀「喜鵲」踢走。大家知啦，紐記隊中有唔少麻煩友，包括開季前要求離隊被拒絕嘅卡比耶，家陣聽到柏杜失勢，仲唔作反咩，隨時玩嘢博輸波趕佢走都唔定，既然紐卡素軍心可能受到影響，作客就更加唔抵博啦！
Data King 拖肥成英超控波王

‧愛華頓中場巴利獲派上陣，即成史上第10個英超上陣500場球員。

‧拖肥糖近10次主場對賽有6勝3和1負。

‧愛華頓今季平均每場59.4%控球率為英超最高。

‧紐卡素今季被對手3次頭槌破門為英超最多。