黑貓未黑完 紅軍「大」得起

猪拉多纳

替工奇雲波爾領軍7成輸波

英超「黑貓」仲未黑完！新特蘭今晚喺主場對利物浦，怒炒迪肯尼奧後仲未請到新教頭，看守領隊奇雲波爾對上一次做替工，領軍10場輸7場相當得人驚，立立亂唔慌可保清白，撞啱紅軍後防大執位，癲鬥癲再加個最黐線嘅蘇亞雷斯復出，梗係要1.82倍入球大啦！

（now621台周日晚11:00直播）
06年做看守領隊10戰7負

迪肯尼奧上季帶領新特蘭護級成功，場邊指手畫腳的確好有款，暑假帶隊嚟香港踢表演賽，仲走去時代廣場睇高達展，幾咁意氣風發，點知轉個頭新特蘭開季連續5場聯賽不勝，佢就即刻食無情雞。不過頂上嘅看守領隊奇雲波爾都唔係乜嘢好嘢，佢從未真正做過英超球隊教頭不特止，06年做替工幫新特蘭帶10場，結果得1勝2和7負慘淡收場。

當年新特蘭包尾降班，今次奇雲波爾再出山，呢場唔失波就真係要還神。不過咁，日前新特蘭喺聯賽盃以2:0砌低彼德堡止血，奇雲波爾仲話打算畀開季前向祖雲達斯買入，周中有波入嘅基亞卓尼利打10號位，增強中前場創造力，睇得出佢雖然唔多識教波，但都叫有啲吉士。值得留意嘅係，06年佢帶新特蘭嘅最後5場波，全部開入球大o架！
紅軍後防「重傷」大執位

對家利物浦有菲臘比古天奴養傷，好在侵略性更強嘅蘇亞雷斯及時復出，唔憂冇波入，淨係睇佢日前對曼聯踢足全場又射中楣，就知狀態冇問題，只不過格連莊臣、丹尼爾艾格、高亞迪斯同阿里施蘇高傷晒，搞到紅軍後防大執位，當中串演右閘嘅高路托尼，擔任中堅嘅馬馬度沙高都係新加盟，默契有限，入得又失得玩入球大仲着數！
Data King 新特蘭半場7連細

‧計埋上季，新特蘭近9場聯賽未試過保持清白。

‧新特蘭過去24次對賽入12球，但得3場贏波。

‧新特蘭開季連續7場開半場入球細。

‧利物浦係今季唯一下半場冇波入英超球隊。
乜都玩錦囊 紅軍要搵人出氣捧上盤

蘇亞雷斯復出玩入球大的確比較正路，不過利物浦今季好似鍾意守多過攻，如果對蘇亞雷斯嘅狀態有懷疑，咁不妨揀紅軍讓半一嘅上盤，始終新特蘭連新領隊都未請到，球員好難的起心肝搏命，更何況利物浦喺聯賽盃輸畀曼聯，梗要搵人出氣，新特蘭好難有運行。