巴西賀國慶 揼扁袋鼠兵

猪拉多纳

輸畀瑞士成肚氣

今晚國際熱身賽巴西會喺主場迎戰澳洲，「森巴兵團」上一場瘀爆輸畀瑞士，撞啱今場喺巴西國慶日對住近況直插谷底、連環輸畀中國同日本嘅「袋鼠兵」，當然要爭番口氣大炒對手，同國內人民一齊慶祝呢個大日子啦，讓兩粒都照捧2.35倍「讓主」！（開賽時間：周日凌晨3:15）

巴西上仗對瑞士，唔單止侯克頻頻錯失入球機會，最終仲因為丹尼爾一個烏龍球輸波，顏面盡失，今場呢兩個「輸波罪人」一齊因傷缺陣，未必唔係好事嚟o架！預計會擔正嘅柏圖自從傷愈復出之後，今季巴甲已經幫哥連泰斯入咗7粒，暫時仲做埋球隊首席神射手添，相信佢今場會搏到盡，爭取重拾正選位置；仲有呀，今次喺正巴西國慶日踢呢場友賽，到時一眾「森巴迷」肯定坐爆成個國家球場幫大軍打氣，主隊唔大勝一場又點對得住班球迷先？
艾奇湯臣分化唔成(火羅)爆

澳洲早前喺東亞盃表現差強人意，雖然話唔齊腳啫，但連環輸畀日本同中國之餘仲要勁失7球，就始終講唔過去囉！前鋒艾奇湯臣可能知道對巴西勝算好低，賽前居然出口術諗住分化對手，佢咁話：「尼馬根本冇其他人講到咁勁，我覺得奧斯卡杜斯山度士勁啲囉！」

尼馬本人聽完之後，只係問咗句「條友叫咩名話？」就同拍檔奧斯卡一笑置之，湯臣嘅「戰術」似乎唔多成功喎！澳洲今場仲有王牌前鋒卡希爾缺陣，真係破蛋都唔使旨意呀！
Data King

‧巴西近7戰獲得6勝，每場勝仗都至少攻入2球。

‧巴西近8戰開出6場入球大。

‧澳洲近8場開出5場大，5場賽事均至少出現4個入球。