迪帥話明唔赦車仔 新特蘭喪攻「大」無畏

猪拉多纳

狂人回歸，唔怕悶親球迷！今晚英超重頭戲車路士主場對新特蘭，雖然兩軍排名差天共地，但以新特蘭新領隊身份回歸英超嘅迪肯尼奧話明，今場波會用喪攻戰術同對方死過，撞啱車仔中場桑馬達狀態大勇踢51場製造45個入球，1.59倍入球大當然抵捧！

（有線201及301周日晚10:00直播）
魅力爆燈 球員爭住賣命

好多人都知道，奧尼爾係我非常欣賞嘅領隊，所以聽到新特蘭話要炒佢，真係堅戥「智多星」難過。不過咁，我相信有料之人奧尼爾好快又會重返英超，所以都冇話好Down嘅。至於近8場得3和5負嘅新特蘭，「貓迷」們一樣唔使太擔心，因為球員時代成個狂派首領咁款嘅迪肯尼奧，有可能成為佢哋嘅救世主，事關以迪帥嘅個人魅力，曾經令史雲頓班球員唔放假賣命，家陣嚟到新特蘭，相信「新狂人」會照辦煮碗，用激情感染班手足，等佢哋盡情搏殺。

事實上，迪肯尼奧賽前已經勁寸咁話，球員時代試過作客射破車仔大門，絕對唔赦對方，仲話唔會吩咐球員死守，目標係要有波入，搶到分就更好咁話。或者其他人話去史丹福橋球場玩喪攻，我未必會信，不過迪肯尼奧份人癲癲喪喪兼有嗰句講嗰句，有咩做唔出先？就算新特蘭有首席射手史提芬費查養傷，只要有迪帥話事，都唔似會玩龜縮。
桑馬達製造咗45個入波

對家車仔喺歐霸盃以3:1打沉魯賓卡山，唔經唔覺近5場已經錄得4勝1負，而且上場唔符合上陣資格嘅射手丹巴巴亞，今場可以打番正選，配合加盟車仔以來，上陣51場有18個入球同27次助攻嘅中場桑馬達，鋒力夠晒可靠。只可惜車路士家陣有中堅加利卡希爾同左閘艾殊利高爾養傷，防線唔係咁可靠，隨時失番1、2粒畀「黑貓」，咁嘅環境，點可以唔撐「入球大」呀？
車仔專恰新帥

‧車路士今季聯賽有12次頭槌入波。

‧車仔前鋒費蘭度托利斯過去對新特蘭入6球。

‧新特蘭近16次英超對車路士得1勝15負。

‧歷來有4次英超領隊首戰就要鬥車仔，戰績只得1和3負。