漢諾威行運主場添食

猪拉多纳

德甲漢諾威主場對史特加，漢諾威上場作客贏奧格斯堡好似發夢執銀紙，成場畀人撳住打竟然攞得晒３分，擺明行緊運，今仗陣容復整又重返今年未輸過嘅主場出擊，面對低潮嘅史特加只小讓平半好值博，黑柴撐1.97倍上盤。

（有線61及64台周日晚11時30分直播）

漢諾威上場喺弱項作客遇上拚死護級嘅奧格斯堡踢得好辛苦，主隊全場有12次黃金機會，但先後中楣中柱，畀漢諾威守衞３度救出空門，剩低嘅又畀表現神勇嘅門將薛拿一一救出，神推鬼擁下一球都入唔到，相反漢諾威全場得兩次大餐士就全部入晒。雖然講形勢同演出，漢諾威只係贏運，但亦睇得出佢哋嘅把握能力有幾強。

事實上漢諾威嘅鋒線陣容令好多大球會羨慕，耶高蘭、艾度拿奧爾、舒拿達夫同蘇拜治都有獨力搵食本錢，今場仲有中場大將沙治奧賓度同首席射手馬美迪奧夫復出，人腳復整。漢諾威係上季德甲唯一主場不敗之師，今季開得唔好，但主場都只係輸過兩場，踏入今年更未嘗一敗，近６次德甲主場出師５勝１和，今晚恃旺有信心爭取連捷。
史特加態沉谷唔起

史特加上仗苦戰以１比２僅負多蒙特，無論勇氣同鬥志都可嘉，不過呢班波一路都係打道氣，順起上嚟戰鬥力唔差，但基於人腳唔平均，踢法過於進取，教練又唔叻，所以沉起上嚟就點搏都冇用，球隊近10場聯賽輸咗７場，如果單計今年成績，佢哋排喺德甲尾二，今仗最攞命嘅係主力中堅尼達美亞停賽，防線弱上加弱，作客頂唔住漢諾威強攻。