熱刺兵疲又冇巴利讓唔起愛華頓

猪拉多纳

周日另一場英超好戲，聯賽3哥熱刺喺主場迎戰第6嘅愛華頓，前者有「力王」加里夫巴利因扭傷足踝，隨時提早收咧，冇咗佢嘅熱刺戰鬥力起碼減半，況且剛踢完歐霸盃疲態畢露，面對以逸待勞嘅愛華頓勁惡踢，愛軍有得受讓梗係揀「讓球客勝」。

（有線302及202台周日晚9時05分直播）

今季熱刺表現令人刮目相看可以話全靠加里夫巴利，呢位威爾斯球星速度快，遠射腳腳七注，後上入楔防不勝防，令佢成為球隊嘅進攻核心。不過，正因為加里夫巴利太搶鏡，易成眾矢之的，當各隊摸熟佢嘅特性後，其威力逐漸減弱，更不幸係佢剛喺歐霸對巴素利嚴重扭傷右腳足踝，今季隨時唔使再預佢，由於隊友習慣圍繞巴利做波，依家都唔知搵邊個孭飛。
維頓漢莫耶斯膺3月最佳

熱刺唔單止要爭前4，仲要分心歐霸盃，上周中8強首回合幾經辛苦先至以2比2逼和瑞士巴素利，勁傷元氣，球員疲於奔命，雖然比利時守將維頓漢剛獲選英超3月最佳球員，但今仗除巴利外，連前鋒迪科爾亦因傷缺陣，主場出擊都唔樂觀。

相反，愛華頓以逸待勞，3月份3場聯賽全勝，令莫耶斯榮膺上月英超最佳領隊，況且佢哋只落後第4嘅車路士4分，仲有機會爭歐聯入場券，近4次對碰愛軍未輸過，就算有費蘭尼同派拿停賽，但影響程度唔及熱刺冇咗巴利，以「拖肥糖」一向硬淨到暈嘅防守，絕對唔怕得番5成功力嘅熱刺，「拖肥糖」作客受讓真係筍爆，強捧「讓球客勝」。