廠仔保飯碗狂炸西布朗

猪拉多纳

兵工廠冇份爭英超同歐聯冠軍，咪以為靜晒就冇乜料到，其實無聲狗咬死人，愈低調就愈得人驚，統帥部落咗柯打畀球員，如果下季冇歐聯踢，就會乘機大清洗重建「廠房」，所以班球員近幾場都搏甩髀，作客對住踢風流波嘅西布朗，球迷等住睇入球騷啦！
西布朗爭踢歐戰玩鬥攻

阿仙奴近8場英超贏6場，追貼車仔同熱刺，強勢反彈重燃參加下屆歐聯希望，事實雲格上任以嚟，佢哋從未缺席過歐聯，下季當然唔想打破定律。佢仲冧掂班主撥出7,000萬鎊引援預算，但係依家要吸引球星加盟，有份踢歐聯係先決條件，而邊個想留低就冇得側側膊喇。

難怪兵工廠近3場踢出好有侵略性同創造性嘅進攻足球，尤其係力保飯碗嘅謝雲奴鹹魚翻生，加埋辛迪卡索拉穿針引線，成條中前場線生猛晒，不過要攞3分嘅話，就要寄望前鋒入多啲波頂住後防失誤！

主場信心爆棚嘅西布朗，一早上岸唔使護級，家陣仲有望爭取下屆歐戰資格，以佢哋強勁嘅邊路反擊能力，搭埋體力化嘅高空轟炸，呢場埋身肉搏戰夠晒睇頭！