皇馬 利雲特攜手做「細」界

猪拉多纳

皇馬日前喺歐聯兵不血刃，輕易以三球斬殺加拉塔沙雷，但話晒幾日後就要喺次回合出戰地獄球場，素來謹慎嘅莫連奴，今晚返西甲實會畀班主力休息，主場遇着鋒力疲弱嘅利雲特，睇定嚟食隨時小勝收手，今場要入球中位數3.5球嘅1.95倍入球細。

（now632台周日凌晨0:00直播）

歐聯8強鬥加拉塔沙雷前，莫連奴喺西甲作客薩拉戈薩收起咗唔少主力，派遣荷西卡利祖、卡卡同馬些路等球員擔正，最終落後下僅靠C朗扳平1:1完場。為咗備戰喺巴拿貝球場嘅首回合，莫帥已選擇半力出擊，更何況今場完咗就要遠飛土耳其，相信莫帥為咗畀班主力養精蓄銳，留力情況只會有增無減，但礙於兩隊實力分野，預料皇馬可以控制戰局小勝。

皇馬唔會盡砌，利雲特亦都幫手獻「細」，連同西甲同歐霸盃，佢哋連開5場細，今季聯賽作客入波每場平均連1球都冇，中前場嘅羅渣馬迪、伊保拉同巴卡路仲約埋一齊啞火，今晚靠佢哋想射破皇馬大門，難啲囉！