孖堡會戰秤先漢堡

猪拉多纳

上周德甲漢堡被收起主力嘅拜仁大炒2比9，要怪只能怪自己後防表現實在差勁，嗰個中堅謝菲布馬，睇落個樣蠢蠢哋，做防守果真成日出事，教練芬克今晚應該會調動一下後防，希望喺中游嘅弗賴堡身上來個大反彈！

漢堡呢支老牌球隊上季排名大跌，僅僅排15名不用降班，今季狀態叫正路番，現時排第9，仍有機會爭歐洲賽資格，不過其人腳質素攻守俱弱，即使有得踢歐霸應該都好快出局。27場聯賽失43球，反映後防錯漏百出，上場表現唔合格嘅謝菲布馬今晚應該冇正選，由文切尼跟韋斯達文踢中堅，左閘馬素贊臣復出，中場派牌靠雲達華治，上周見到只要雲達華治冇態，前面就完全無晒輸送，所以呢位荷蘭中場能否重拾狀態好關鍵，前線上繼續擺放「孫仔」孫弘民及「老泥仔」魯迪尼夫斯，理論上整體陣容會比上仗完整。
弗賴堡似無心玩歐戰

弗賴堡排第7亦有機會爭踢歐洲賽，不過唔係隊隊德甲球隊都有興趣踏足歐洲戰場，好似法蘭克福咁，好明顯佢哋唔想爭歐聯資格，疑似多場刻意失分，弗賴堡近5場聯賽僅1勝，鬥心亦成疑。該隊首循環於主場跟漢堡互無交收，作客方面表現亦平庸，雖然上周擊敗慕遜加柏止跌，但前3場聯賽共失掉11球，狀態唔會比漢堡好好多。被大炒完嘅漢堡小讓平半，既然對手唔強，知恥近乎勇下信多漢堡一次！

（有線61、64、201及203台周日凌晨零時30分直播）