寸王熟晒路 皇馬「-2」照殺

猪拉多纳

加拉舊部雙星 有幾多好清楚

早排歐聯爆出陰謀論，話有間土耳其電視台揭露8強抽籤造假，內定皇家馬德里抽中對8強入面牌面最弱嘅加拉塔沙雷！小弟唔知呢件事係真係假，不過皇馬實力同經驗又真係高加拉塔沙雷幾班，教練莫連奴又熟晒對方兩大球星杜奧巴同史奈達條路，今晚皇馬喺主場先拔頭籌大勝一場唔出奇，讓2球都照捧2.03倍「讓球主勝」！

（有線61、64、201及203、中央5台周四凌晨2:45直播）
皇馬o趙紅魔狀態回升

皇馬自從喺西甲爭標無望後，講到明主攻盃賽。果然，歐聯16強成功淘汰曼聯，雖然話贏得有少少夠運，但狀態無可否認提升唔少，王牌C朗更係愈踢愈有，中場莫迪歷自從對曼聯射入球世界波後，更加係信心返晒嚟，搞到另一王牌卡卡連後備落場嘅機會都冇乜，就知皇馬實力有幾雄厚。
加拉入8強超額完成

加拉塔沙雷喺分組賽幾乎出局咁滯，最後僥倖出線，之後即時加碼簽入杜奧巴同史奈達兩大巨星，結果16強順利淘汰史浩克04。對呢隊土超勁旅嚟講，其實今屆入到8強已經超額完成，兼且仲彈起個超級射手布拉卡爾馬斯，算係有啲收穫啦！不過，加拉陣中擔到大旗嘅人唔多，同「銀河艦隊」根本無得比。

雖然話加拉有史奈達同杜奧巴坐鎮，不過史奈達喺國際米蘭、同杜奧巴踢車路士嗰陣都跟過莫連奴搵食，「寸王」熟晒路要嘜死佢哋真係話咁易！早前有消息話莫連奴已經決定下季返車路士，無論點，佢依家梗係想做多次歐聯冠軍教頭，帶領皇馬捧盃先啦，所以今晚主場K.O加拉塔沙雷絕對無問題。
加拉歐聯作客旺開大

‧皇馬連續10場不敗。

‧皇馬今季主場未輸過。

‧C朗近4仗射入5球。

‧加拉今屆歐聯4場作客3場開大。
中位數3.5球照博大

兩支球隊都有擅射嘅進攻球員孭飛，又各自有死球專家，火力肯定有保證。雖然入球大中位數升至3.5球，不過從另一個角度睇，亦反映外界有信心今仗會大手交易。翻查紀錄，皇馬今屆4次喺巴拿貝球場踢歐聯，有3場都出現至少4個入球，1.85倍入球大仍然抵玩。
頂占筍盤：皇家馬德里（讓球主勝）