彭美拉斯掃「雷」息民憤

猪拉多纳

上個禮拜五係耶穌受難節，估唔到巴甲球隊彭美拉斯球員都要齊齊受難，被激進球迷「釘」上十字架，教練基連拿亦都因為戰績差劣隨時飯碗不保，為咗平息民憤，聽朝自由盃B組面對近況一樣咁沉嘅阿根廷球隊堤格雷，梗係要醒醒定定做番齣好戲啦，一於捧1.62倍主勝。

（開賽時間：周三早上8:30）
激進Fans「釘」球員上十字架

彭美拉斯假假哋都係巴甲傳統勁旅，點不知上禮拜四竟然喺聖保羅州聯賽輸畀隊巴西第4級別隊伍米拉索2:6，賽後有激進Fans漏夜走去佢哋個帕卡恩布主場宣洩不滿，喺球場外圍嘅草地戙起13個十字架，其中6個仲分別寫上後衞祖連奴巴布沙、里奧加高、馬高斯雲尼斯奧斯、安德里雷斯、中場查理斯達施華同韋斯利盧比斯嘅名兼出生日期，睇得出班球迷幾嬲。

仲有呀，正正係因為呢場敗仗，彭美拉斯會長諾保已經向主帥基連拿發出最後通牒，再唔交出好成績就即刻兜，你話佢老人家同班手足又點會唔知驚吖？好彩，聽朝佢哋喺自由盃嘅對手堤格雷近況一樣咁衰，上輪阿甲畀高隆開齋不特止，一對中場派奧同加馬利尼亦都因為腿筋受傷缺陣，衰鬥衰梗係揀有主場之利又要急住交代嘅彭美拉斯啦！

自由盃B組