最激豪門星戰 PSG齊章唔怕巴塞

猪拉多纳

歐聯8強首回合，今晚殺埋身！法國「暴發戶」巴黎聖日耳門喺主場迎戰「地上最強」巴塞隆拿！勁激！雖然巴塞喺16強次回合絕地反擊，成功淘汰AC，不過佢哋近年喺歐聯嘅作客戰績並唔理想，唔似讓得起有伊巴謙莫域復出、夫添出擊嘅PSG，2.15倍「讓主」可以一試。

（有線61、64、201及203周三凌晨2:45直播）
伊巴謙倒戈未贏過巴塞

巴黎聖日耳門今季嘅歐聯路相當平坦，分組賽對手唔算太強，去到16強面對華倫西亞亦輕鬆過關，反映教練安察洛堤嘅歐戰經驗真係幫到手，今仗對手即使係巴塞，但以安帥曾經帶領AC搞掂巴塞嘅功力，即使贏唔到亦未必會輸嘅。

最令「張峰」放心嘅，係伊巴謙莫域上訴成功可以披甲，有呢位鬥心爆棚嘅「鋒神」壓陣倒戈，PSG已經唔可以睇小，就算佢離隊之後3戰巴塞未贏過都唔使怕。而且呢班波入球分布平均，無論柏斯托尼、拿維斯、加美路，以至堤亞高施華都有出色嘅入球能力，以為淨係入31球嘅伊巴謙恐怖？未免太天真喇！
「作客蟲」巴塞有維帥隨軍

係，雖然另一位前巴塞球星莫達上陣機會只係五五波，不過歐聯經驗豐富嘅碧咸已經操到弗晒，今晚好可能會正選落場，「萬人迷」嘅「七旋斬」，肯定會為不擅應付高空波嘅巴塞帶嚟一定威脅，你話PSG入到1、2粒，真係一啲都唔奇。

對家巴塞都有沙維同佐迪艾巴傷愈復出，領隊維蘭路華亦有隨軍出發，上演康復後第1擊，弊在「地上最強」近排嘅作客戰績真係嚇死你，6戰居然僅得1勝，仲要失咗成9粒波，而且佢哋喺歐聯嘅作客成績向來唔多掂，今屆就先後作客輸畀些路迪同AC，今鋪面對實力更強嘅PSG，就算有傳近期表現出色嘅小將基斯甸泰路取代阿歷斯山齊士踢正選，都未必搞得掂「法國豪門」啦！
巴塞近6次作客失9粒

‧連盃賽在內，聖日耳門連續13仗主場不敗。

&#8231SG今季歐聯6戰都未輸過波。

‧巴塞近6場作客僅得1勝，失咗9球。
歐聯賽制

採主客兩回合制，今輪為8強首回合，設作客入球優惠，若未分勝負於次回合法定時間後加時30分鐘，再和則互射12碼決勝。
張峰來料：巴黎聖日耳門（讓球主勝）