拜仁鋒芒過露 捧祖記「讓球客勝」

猪拉多纳

拜仁鋒芒過露，鬥「斑馬兵團」主W得1.44倍，分分鐘會重演上屆決賽悲劇！歐聯8強首回合拜仁慕尼黑主場鬥祖雲達斯，主隊雖上周末單場轟入9球，非常Sharp醒，但出到歐聯又係另一回事；祖記實而不華，喺歐戰已經3年不敗，被睇低啱晒佢哋發揮，受讓值捧！

（有線62及202台周三凌晨2時45分直播）
小豬復出 主W過熱

拜仁近年愈踢愈好，上屆殺入歐聯決賽，本季德甲所向披靡，班波星味愈來愈濃，加埋剛於德甲數漢堡9比2，成個棚搭好晒，搞到今仗勁聚飛，個W熱到唔夠1.5倍，換算番亞洲盤即係讓到1球，可惜似乎有啲鋒芒過露，如果班球員贏到飄飄然，嚟到歐聯戰場隨時「中伏」。冇錯拜仁班波係強，但今次對手唔係漢堡之流，而係大熟大勇嘅祖雲達斯，呢個W真係熱到離晒大譜。上屆決賽車路士被睇低，但就死守成功保不敗，祖記守得和拜仁絕對唔奇。

事實上，今屆拜仁於歐聯演出唔算太標青，分組賽曾輸過畀巴迪，上圈主場更輸畀阿仙奴0比2，仲幾乎畀兵工廠實現大逆轉。計人腳拜仁喺德甲當然可以橫掃，但歐聯去到8強冇弱旅，每場都要踢得好小心；祖記作客好整以暇，拜仁就算有「小豬」舒韋恩史迪加復出，亦未必咬得入對手。
意大利波最砌「德」

意大利球隊一向擅踢盃賽，尤其係做underdog，往往有更佳發揮，上年歐國盃4強，意大利就於被睇淡下砌低德國，相信大家仲記憶猶新。

「斑馬兵團」近3年歐戰未輸過，本屆作客和過車路士、贏過薩克達，絕對實而不華，上仗意甲作客擊敗國米，狀態絕對唔會曳得過拜仁，個「讓球客勝」有2.5倍，好路！
數讀歐聯

（1）自04年起雙方碰頭6次，拜仁只贏1次，輸4次

（18）祖雲達斯於歐洲賽保持18場不敗

（4）09年歐聯分組賽，拜仁作客祖記轟入4球，贏4比1

（17）對上18次歐洲賽主場出戰，拜仁贏17場

（5）對上祖記5次於8強遇上德國對手，全部晉級