攔路虎富咸拒送分 昆士柏流浪護級「大」鑊

猪拉多纳

隨住韋根近期連環爆SEED，英超榜尾形勢出現重大變化，剛炒奧尼爾嘅新特蘭已經捲入降班漩渦，近期愈踢愈沉嘅史篤城亦開始令人擔心，至於榜尾方面，有新帥艾堅斯上任嘅雷丁已經九死一生，尾二嘅昆士柏流浪亦都唔好得幾多，今晚作客富咸，1.88倍入球大屬首選。

（有線200、300及廣東體育周二凌晨3:00直播）
排尾二愈想贏失波愈多

昆士柏流浪下半季搵嚟護級專家夏利列納領軍，再加上唔少星級戰將加盟，唔少人都認為佢哋可以逃出生天，而事實上列納叔領軍嘅頭幾場波，防線漏洞明顯減少，但近來佢哋由先求不失到改以3分為目標之後，雖然新加盟嘅鋒將雷米及安祖斯唐辛都交到貨，衰在同時間卻中門大開，連續5場都未能保住清白之身。

英超同其他聯賽唔同之處，就係攔路虎特別多，所以富咸即使一早上岸，近期都仍然屢有佳作，上輪更作客擊敗爭緊前4嘅熱刺，今仗面對同市嘅昆士柏流浪，亦唔似會隨便送分，最緊要係射手貝碧托夫呢期回勇，已經連續3場入波，呢位保加利亞射手由於唔使踢國際賽，休戰兩個星期後肯定叉足電，可以同QPR駁火。