多蒙特留力歐聯撐史特加

猪拉多纳

經過世界盃外圍賽休戰後，德甲今晚重燃戰火，多蒙特依家聯賽爭標無望，目標已經放喺之後嘅歐聯8強戰身上，今場作客史特加未必會搵命博，史特加受讓撐2倍「讓球主勝」。

（有線61周六晚10:30直播）

「蜜蜂兵團」落後拜仁20分，衞冕已經幾乎無可能，但仲拋離第4位嘅法蘭克福10分，冇乜搶分壓力，留力應付下周作客馬拉加嘅歐聯8強首回合仲實際，更何況後防主將曉姆斯養緊傷，一班德國國腳又啱啱踢完兩場波，今仗休息係人之常情。
蜜蜂失分或造就拜仁提早封王

史特加之前因分心歐霸盃搞到成績大跌，不過出局之後可以重新專注聯賽，上輪佢哋就作客贏咗法蘭克福，終止4連敗走勢，查實佢哋前線有伊比斯域、岡崎慎司同借將馬捷達三把尖刀，後者更為一紙長約搏命，就算左閘摩連拿路停賽，主場要搶分都唔係難事。

值得一提，今晚多蒙特一旦失分，拜仁喺尾場只要主場砌低漢堡，就可以提早7輪封王，各位球迷記得捧場。

（有線61、64、201、203及中央5台周日凌晨1:30直播）
頂占筍盤：史特加（讓球主勝）