皇馬爭8連勝格「薩」勿論

猪拉多纳

全速啟航嘅「銀河艦隊」皇家馬德里挾住7連勝氣勢，喺今晚西甲出訪近排死晒火嘅弱旅薩拉戈薩。雖則話皇馬嚟緊仲有歐聯要打，但話晒首回合留番喺西班牙作賽，今仗作客可以放心出擊，1.87倍「讓客」值得捧場。

（now632台周日凌晨3:00直播）

近排喺西甲、西盃同歐聯三路戰線都贏到開巷嘅皇馬，主帥莫連奴梗唔會想佢哋收油，再者，佢哋只係以1分壓住第3位嘅同市死敵馬體會，為咗面子，呢3分志在必得。

冇錯，佢哋下周四凌晨係有歐聯8強要踢，但只係喺巴拿貝主場迎戰次一線嘅加拉塔沙雷，根本唔使過分留力。人腳方面，踢完國際賽後證實冇新「十字兵」，之前稱傷嘅C朗，喺玻利維亞吸晒氧氣嘅迪馬利亞都冇問題，莫帥手上大把籌碼，無論派邊個落場都夠殺有餘啦！
薩拉戈薩連續12場未贏過

薩拉戈薩已經12戰未贏過，當中9場冇入波，排名跌到落尾4，主帥占美尼斯雖然話仍獲球會信任，但球員落到場仲有冇信心都難講，就算正選門將羅拔圖占美尼斯同中場重心艾邦奴及時傷愈，以佢哋近3季主場對皇馬全敗嚟睇，今晚都係會照做炮灰啦！