西班牙焗攻益哂法國

猪拉多纳

往績冇着數 韋拿唔識入波

2014世盃外今晚爆發話題大戰，法國喺歐洲區I組主場對西班牙，受讓平半抵捧。現時「鬥牛軍」以2分落後法國，作客焗攻已經擇使，最慘係除咗熱身賽，西班牙作客「高盧雞」對賽輸蝕，相反法國嘅賓施馬要打爭氣波，華布拿同列貝利又咁弗，是但一件都可以做英雄！（now714台及中央5台周三凌晨4:00直播）

西班牙日前離奇喺主場被芬蘭逼和1:1，為咗重奪首名出線主動權，今晚作客法國，形勢上係非勝不可，弊在佢哋除咗有中場大衞施華停賽，左閘佐迪艾巴又要因傷缺陣，就算兩大中場沙維同沙比阿朗素趕得切傷愈復出，臨場變陣始終唔着數。咪忘記門將域陀華迪斯唔夠受傷嘅卡斯拿斯穩陣，一味掛住攻好容易出事。事實上，西班牙過去5次作客對法國，只得1勝4負，依家要靠好番冇耐嘅射手韋拿孭飛，大家有睇上場波，就知韋拿無復當年勇啦，仲點破宿命呀?
華拉尼 賓施馬專恰巴塞兵

另邊廂嘅法國，最近喺熱身賽贏過意大利2:1，對住德國都只係完場前失守輸1:2，難怪中場列貝利信心爆棚，賽前講明西班牙用咩戰術都好，法國一樣唔會怕，呢位拜仁中場仲寸到話首循環作客西班牙踢成1:1，今晚回師主場，贏埋都仲得呀！

大家又唔好怪列貝利咁寸喎，事關上仗佢同華布拿喺中場勁合拍，成場波玩晒，係，雖然嗰晚法國射手賓施馬唔肯唱國歌被插，但大家要留意，佢為皇馬出戰巴塞，最近2季入過4球，作為佢球會隊友嘅中堅華拉尼，近3次交手仲入兩粒，佢兩個都可以話係巴塞剋星。據估計，呢場大戰西班牙會派7件巴塞兵打正選，睇怕賓施馬屈埋成肚氣，係時候發威玩殘西班牙喇！

歐洲區I組
鬥牛軍4仗世盃外3次零失球

‧兩軍歷史上交鋒31次，法國有11勝7和13負。

‧西班牙連續49場世盃外圍賽不敗。

‧西班牙連續4場世盃外先開紀錄。

‧西班牙今屆4場外圍賽有3次保持清白身。