熱Ｗ唔夠1.1倍冇肉食? 教你點歎

猪拉多纳

賭波講值博率，熱W賠率低到唔夠1.1倍，中咗都唔夠楔牙罅，買嚟把鬼咩！但足球菠菜，最重要係靈活變通，唔玩齋W仲有大把賭法。今輪世界盃歐洲區外圍賽，德國、意大利、愛沙尼亞同烏克蘭分遇弱旅，我哋就提供唔同投X方法，等大家化腐朽為神奇，齊齊贏到盡！
德國「-3」冇有怕

C組德國主場迎戰哈薩克，兩軍4日前至碰過頭，德軍以無鋒陣作客，要適應時差同人造草球場問題，都毫不費力贏三粒，今仗返到紐倫堡主場出擊，相信會加多兩錢肉緊，預計贏得更多，「讓球主客和」德國讓三球，照捧「讓球主勝」。

（now 633周三凌晨3時45分直播）

德國上周五作客輕取哈薩克3比0，但德國傳媒唔係幾收貨，今仗返到主場，教練勒夫當然要交功課。德國今仗陣容繼續唔完整，中場大將舒韋恩史迪加停賽，守將賀維迪斯同天才中場達斯拿有傷，不過馬高列奧斯停滿復出，有佢同最佳拍檔馬里奧葛斯攻堅，呢個無鋒陣威力比4日前更強。

哈薩克今屆外圍賽兩場作客全敗兼零入球，上次作客奧地利都要淨吞4蛋。德國同哈薩克歷來只有3次交手紀錄，德國全勝，其中兩次作客都係贏3比0，唯一主場嗰次贏夠4比0，今晚德軍只要認真些少，起碼都可以贏到呢個比數。