英軍迷失黑山

猪拉多纳

打硬仗例牌冇料到

英格蘭永遠冇想像中咁強，將再一次「迷失黑山」！世界盃外圍賽歐洲區H組賽事，英軍作客撼榜首黑山，「三獅兵團」熱身賽贏巴西也文也武，但打硬仗就連波蘭、烏克蘭都贏唔到。黑山實而不華，近兩次鬥英軍都不敗，受讓必捧！

（now 635周三凌晨4時直播）

英格蘭最近好sharp醒，贏完巴西2比1，上仗就贈聖馬力諾8蛋，勢頭好到你唔信。但呢班波永遠得個樣，頂多只能算係四平八穩，缺乏強攻本錢。朗尼做輔鋒好過正箭頭，迪科爾、韋碧克級數平庸，面對主守球隊，經常老鼠拉龜，加上心理質素又曳，久攻不入自己就會亂，可以話毫無霸氣。

目前英軍排小組第2，早前鬥波蘭、烏克蘭兩支歐洲二線兵，名氣係大過人喇，但落到場根本毫無甜頭，踢得非常辛苦，最後都打和收場。英軍實力周時被高估，今仗客Ｗ得1.7倍，又唔穩陣又冇肉食，就算有謝拉特、艾殊利高爾、占士米拿復出都信唔過。況且英格蘭自2011年起，贏完兩場即「現形」（見附表），例牌「勝不過三」，飄忽到冇朋友。
兩戰黑山和波輸盤

講名氣，黑山當然差一大截，陣中講嚟講去，都係隊長胡仙歷同中場祖維迪，如果你識埋中堅史提芬沙域，都已經算叻仔。但踢波係講整體，呢班波勝在夠機動，分組賽5戰4勝1和佳績唔係呃番嚟；而對上兩次鬥英格蘭，作客和0比0，主場就和2比2，根本唔驚對手，今次擺明車馬又打穩守突擊啱晒發揮，加上英軍鬧中堅荒，尼史葛拍基斯史摩寧分分鐘出事，黑山「讓球主勝」有2倍非常抵玩。
胡仙歷寸朗尼EQ低

黑山隊長胡仙歷出口術，話朗尼會同兩年前一樣，於波德戈里察食紅牌離場！2011年，朗尼代表英軍作客黑山，佢無喇喇發癲怒踢對手被罰離場，胡仙歷寸佢EQ奇低，今場畀主場球迷激得兩激，分分鐘會重蹈覆轍！

11年10月８日，英軍於歐國盃外圍賽作客黑山，朗尼突然火遮眼做錯事，搞到球隊失晒預算，最後被黑山逼和２比２完場。祖雲達斯前鋒胡仙歷舊事重提，話朗尼今場或者又食紅牌：「朗尼當然好波，但成日控制唔到脾氣。我哋班粉絲記得佢兩年前做過乜，今場會提番佢，到時咩事都會發生！」但尼史葛就勸對手唔好激朗尼：「朗尼好勝心好強，被惹怒下或者踢得仲好。」
隨時再做「紅牌阿姑」

黑山當然希望朗尼又領紅喇，但今場球證瑞典籍艾歷臣一向少畀牌；４年前英軍熱身賽對斯洛文尼亞，朗尼於禁區插水，艾歷臣仲被呃到，畀咗個12碼英格蘭添！