羅馬尼亞細擋荷蘭

猪拉多纳

世界盃歐洲區外圍賽，其中Ｄ組榜首荷蘭主場對羅馬尼亞。「橙軍」現於小組五場全捷，實力可謂大超班，要贏羅馬尼亞根本冇難度，不過荷蘭遙遙領先，今場冇必要贏到盡。更何況羅馬尼亞立心爭次名，應唔會同荷蘭硬撼，縮後防守博摸和係球隊目標，預料今場入球數字唔會高，博細盤較為可取。

（無綫翡翠台周三凌晨３時30分直播）
曾被炒過唔敢鬥攻

首循環羅馬尼亞懶醒同荷蘭對攻，結果「橙軍」作客以四比一大勝羅馬尼亞。受過教訓之後羅馬尼亞今次去到荷蘭肯定唔會輕出，唔排除會踢消極足球以消磨荷蘭鬥志，喺踢法被動嘅情況下，好難想像得到羅馬尼亞可攻破荷蘭大門。講真，羅馬尼亞攻力已經大不如前，前鋒梅度嚴重老退係其中一個原因，既然冇把握入波不如縮後穩守，能打和強隊荷蘭都唔失禮。

荷蘭猛將如雲，如果打真軍肯定可以數對手幾粒，但因荷蘭喺Ｄ組一枝獨秀，搶分決心唔算太強。今場對住羅馬尼亞只會點到即止，穩定局勢後就控球在腳。荷蘭將帥都有豐富大賽經驗，今場絕唔會浪費氣力，細盤可以留意。