俄羅斯「主場」凍瓜巴西

猪拉多纳

鬥北愛延期勁餓波，英國暴風雪似「屋企」

俄羅斯玩轉「主場」！今晚國際友誼賽，巴西喺倫敦嘅史丹福橋球場硬撼俄羅斯，俄軍之前鬥北愛場世盃外圍賽兩度延期都踢唔成，成班球員一早養足晒精神，加埋倫敦連日出現暴風雪，凍慣晒嘅「雙頭鷹」同喺主場出戰冇分別，今鋪面對名大於實嘅巴西，絕對有條件保住不敗，2.4倍「讓客」值捧！（中央5台周二凌晨3:30直播）
卡比路臨時臨急搵酒店

俄羅斯今個國際賽期都唔知算好運定黑仔，先係鬥北愛爾蘭嘅世盃外因惡劣天氣兩次都踢唔成，家陣或者要延期到6月，領隊卡比路仲因為咁而要延長酒店Booking，點不知卡帥住緊嗰間係蜜月套房，一早畀對新人訂咗，搞到佢被迫搵過另一個竇落腳，都幾狼狽o架！

雖然俄軍好似諸事不順咁，但對投X人士嚟講，呢單嘢都唔算壞消息嘅，事關一眾球星可以養精蓄銳，餓咗波咁耐，今晚點都唔驚佢哋會就住就住。最重要一點，係俄羅斯今鋪佔盡「地利」，皆因倫敦家陣得嗰幾度，仲要連日打風落雪，天氣同俄羅斯嗰邊差唔多，一眾俄軍又點會有問題吖？反而以本土聯賽球員為骨幹嘅巴西，就未必咁習慣喇。
森巴防中拉美利斯打柴

撇除呢啲因素，俄羅斯都夠料同巴西鍊過o架，皆因佢哋唔單止近7戰不敗，友賽意大利、世盃外鬥葡萄牙都一樣開到W，實力有番咁上下。論人腳，俄軍有「新沙皇」迪沙高耶夫，拍住今季為辛尼特上陣16次攻入11球嘅王牌前鋒基沙哥夫，鋒線威力驚人，配合近6戰有5場不失球嘅硬淨防線，莫講話和波，就算贏埋都唔出奇！

對家巴西家陣喺國際足協排名跌到史上最低嘅第18位，早前先輸畀實力唔強嘅英格蘭，面對意大利更喺領先2球下被追和，證明今時唔同往日，就算領隊史高拉利講明會畀堤亞高施華落場，衰在防中拉美利斯打柴，防守力隨時不升反跌，根本讓唔起俄羅斯。
森巴軍排18史上新低

‧巴西近8場賽事有7次開入球大，當中5鋪開「半大」。

‧俄羅斯近7場友誼賽都保持不敗。

‧巴西家陣喺國際足協排第18位，係國家隊史上最低。
兩軍駁火吼埋入球大

巴西一向攻優於守，有尼馬、侯克同費特3箭齊發，要入波就應該唔難嘅，只不過佢哋4件守將馬些路、大衞雷斯、堤亞高施華同丹尼爾都勁鍾意助攻，防線成日出現漏洞，難怪佢哋連續4場都有失波啦！今晚「森巴軍」嘅對手係火力強勁嘅俄羅斯，勢必上演入球騷，呢個1.75倍入球大，分分鐘未到半場已經等收錢！