不死鳥有霸氣作客飲勝

猪拉多纳

今季日乙賽事被視為關西三雄天下，由日職降落乙組嘅神戶勝利船及大阪飛腳同屬爭冠熱門，但若論整體演出，另一關西球隊京都不死鳥更對辦，不死鳥上輪大炒勝利船盡顯霸氣，現時球員狀態箭嘴向上，今周作客富山勝利可再下一城，可捧客Ｗ！

（周日中午12時開賽）

有別於其餘兩支關西球隊，不死鳥冇乜大牌球星擔大旗，隊內最大名氣係布基納法索國腳沙路，新兵山瀨功治曾經係日本邊緣國腳，但都唔係天王巨星。不過，不死鳥踢落好硬淨，開咧戰作客大阪飛腳反客為主狂攻對手，上仗主場鬥神戶勝利船更大勝四比一，佢哋喺兩場關西打吡踢到曉飛，即時成為升班熱門。

不死鳥陣內有唔少優質土炮，兩個九十後射手宮吉拓實及久保裕也都活力十足，輪住踢令對手疲於奔命，另一箭頭原一樹上場打破超過十個月入球荒兼起孖，前線幾個球員信心極強，作客一樣會繼續攻。富山勝利今季鋒力疲弱，近三戰只於主場射入一球，對手仲係客場蟲FC愛媛，冇乜料到，主場都頂唔住不死鳥。
飛腳防線穿窿捧市原

同日大阪飛腳主場對千葉市原，飛腳續有兩大主力今野泰幸同遠藤保仁代表日本缺陣，佢哋上場贏住兩粒都被逼和，始終都係未解決後防問題，今次讓唔起實力分子市原，博「讓球客勝」。