獅吼爭季後賽顯雄心

猪拉多纳

澳職常規賽接近尾聲，前四位置大局已定，剩下兩個季後賽席位相信不出FC悉尼、珀斯光輝、紐卡素噴射機或者布里斯班獅吼。獅吼今日主場對墨爾本雄心，搶分戰意極高，反觀雄心三連敗狀態低迷，加上兩位防線主力高洛斯莫、柏德列基赫特缺陣，可謂雪上加霜，淨輸兩粒應屬最低消費，捧「讓球主勝」。

（周日下午2時開賽）

上季總冠軍布里斯班獅吼今季走晒樣，外界對佢哋爭標已經唔抱希望，但如果連前六位都冇，打唔入季後賽，實在好難向球迷交代。幸好獅吼失分較噴射機同光輝少，只要全取餘下六分，就可以進身季後賽，點都會搏埋未來兩仗。獅吼近期面對前列球隊阿德萊德聯同墨爾本勝利，都搶到分，今次鬥弱隊雄心，可趁機爭取大勝提升士氣。
雄心失防線支柱聽炒

墨爾本雄心難望打入季後賽，愈踢愈沉，已連輸三場，作客更加係七連敗。最大鑊係兩位守將高洛斯莫同柏德列基赫特，分別因為停賽同入選國家隊而缺陣。雄心本身防守已經差，仲冇埋兩位防線支柱，情況更加惡劣，大敗唔奇。