風林讓球勝有雞偷

猪拉多纳

水手唔齊腳讓波擇使

日本聯賽盃第二輪賽事展開，A組甲府風林主場對橫濱水手，水手季初靠晒馬昆奴斯爭取士哥，呢位老牌射手上場士哥後瘋狂慶祝被逐，搞到今仗要停賽，大軍冇咗呢把尖刀，仲要作客讓波，梗係危危乎啦！蘇豪博風林不敗，要「讓球主勝」。

（周六中午12時開賽）

橫濱水手開季聯賽連盃賽四連勝，合共轟入十二球，馬昆奴斯包辦六粒，包括上場聯賽盃對川崎前鋒一箭定江山，弗到冇朋友！呢位球星上場尾段入波後high到唔記得自己有牌在身，竟然學人除衫慶祝，球證揸正嚟做整張黃牌佢歎，今戰要坐波監，加上防線重心粟原勇藏要代表日本出賽，前、後各少一個猛將，戰鬥力大打折扣，連勝紀錄隨時斷纜，被捧成熱門唔抵玩！
曉高甘馬雷斯有料到

甲府風林並冇球員參戰國際賽，基本上所有主將都可候命，會方今季失去王牌射手達維，但新巴西前鋒曉高甘馬雷斯交到貨，喺前線極具威脅。為咗增加護級本錢，佢哋近期引入埋前巴拉圭國腳奧迪高沙，嚟緊將以南美鋒線抗敵，前景唔算太差。風林連續兩場聯賽主場輸波，一再令粉絲失望，今次佢哋決心喺盃賽打番場爭氣波，趁對手唔齊腳，有力保持不敗，博「讓球主勝」！