英格蘭劏魚腩「-4」照撐

猪拉多纳

今晚世界盃歐洲區外圍賽H組賽事，聖馬力諾會喺主場迎戰英格蘭。「三獅兵團」中堅人選喺賽前雖然換唔停，之不過對住聖馬力諾呢件「極品魚腩」，補選嘅哥爾卡同尼史葛根本綽綽有餘，加埋前線「黑雙煞」同朗尼幾把利刃，就算讓到4球咁辣，都照捧1.67倍「讓客」！

（開賽時間：周六凌晨4:00）

「三獅兵團」中堅位置可以話係多災多難，除咗熱刺嘅戴臣受傷落選，令主帥鶴臣甘願食言重召里奧費迪南，可惜里奧又因為「背傷門」冇隨隊，不過咁都未算，早兩日軍醫仲證實加利卡希爾今晚肯定冇份。

老實講，如果今場係鬥同組最強嘅黑山，咁樣中門大開法真係幾令人擔心，但對住「魚腩」聖馬力諾，補選入伍嘅哥爾卡同尼史葛夠照有餘，前者喺英格蘭U21被提拔做大國腳，後者喺曼城畀文仙尼雪到硬晒，兩人難得有機會喺國際大舞台演出，梗係會砌盡證明身價啦！
聖馬力諾頭4輪失16球

雖然英格蘭冇咗翼鋒艾朗連儂，但就繼續有禾確特同艾舒利楊格雙翼齊飛，配合埋經驗活力俱備嘅朗尼、「黑雙煞」韋碧克同史杜列治喺前線搵食，肯定會殺對手一個片甲不留。另邊廂聖馬力諾有幾魚腩唔使多講，但呢支歐洲排名最低嘅國家隊有個「優良傳統」，就係對上兩屆歐國盃同世界盃分組賽，埋單失波全部達到40+，依家佢哋4輪失咗16球，換句話講即係大把Quota啦！

歐洲區H組