巴西搶W 3箭齊發

猪拉多纳

重量級對決 意大利Hea踢

國際賽期又殺到嚟啦！今晚率先上演重量級熱身賽，巴西同意大利喺瑞士日內瓦中立場交鋒。「森巴兵團」特意請02年世界盃冠軍主帥史高拉利回巢，備戰明年喺巴西主場舉行嘅決賽周，點知首仗領軍就輸波，令巴西足總嘅決定備受質疑。史帥今仗既要幫老細解圍，亦要為自己省靚招牌，實在不容再失，擺出3箭頭強攻求開齋。意軍一向唔重視熱身賽，下周中又要踢世界盃外圍賽，更加唔會搏，主W1.81倍抵玩。

（周五凌晨3時30分開賽）
史高拉利要挽面子

巴西係明年世界盃決賽周主辦國，對第6次奪冠志在必得，巴西足總上年年尾突然炒領隊文奴文尼斯，請「大菲」史高拉利出山執教，都係想喺自己地頭重溫02年捧盃美夢。不過，佢上月首仗出擊就輸畀英格蘭，重召愛將朗拿甸奴又射失12碼，成為輸波關鍵，可謂雙重打擊，巴西輿論指足總換帥根本弄巧成拙。「大菲」見勢色唔對，今次狠下心腸飛起「細哨」，近日頻頻演練433陣式，派晒「森巴兵團」現時最勇猛3箭頭侯克、費特、尼馬搏殺，可見求勝心切。

至於意大利目標完全唔同，佢哋一心想喺下周中世界盃外圍賽作客擊敗馬爾他，今仗勝負無關痛癢。或者有人認為對手係巴西，意軍為面子點都會落多幾錢肉緊。咁又未必，意大利傳統上忽視熱身賽，上月對另一支名牌荷蘭，領隊柏蘭迪利雖然派出強陣，但踢落無厘生氣，被以小將為主嘅荷蘭狂攻，落後都照換走派路，最終逼和1比1只係夠運。
留力下周世盃外搏殺

意軍對單輪熱身賽都懶懶閒，更何況今次一周雙賽，必定留有一手，包括收起新星艾沙拉維，用巴洛迪利同奧斯華度打雙箭頭，但兩人類型相似，以前合作格格不入。例如上年對丹麥，奧斯華度被逐後，巴神表現反而更醒神，跟住仲入波。兩人今次再拍檔，恐怕只會益咗巴西。中堅基亞連尼有傷，巴沙利同邦路斯嘅組合畀唔到人信心，加上左閘會用新人迪施基利奧，亦係缺口之一。意大利戰意不足，陣容不整，抵擋唔住巴西進襲。