費倫主場狂熱炒得起

猪拉多纳

周日意甲重心係費倫天拿，近期狀態弗爆前線着火，今晚主場迎戰有半隊主力受傷嘅熱拿亞，贏波係簡單任務，Ali推介2.02倍「讓球主勝」。

（周日晚10時開賽）

今屆意甲三甲位置爭持激烈，暫居第4嘅費倫天拿目前落後AC米蘭3分，只領先緊隨其後嘅國際米蘭同拉素1分，下屆歐聯參賽資格肯定要鬥到尾。費倫天拿今仗集有利條件於一身，球隊主場威力喺意甲排第2，至今14場主場聯賽贏咗10場，近期主場3連勝，包括大炒國際米蘭4比1，上仗作客都贏拉素2比0，更加踢出超水準，兩名攻擊主力拿積同祖維迪踢到曉飛，今仗又可以夫添出擊，主場迎戰弱旅贏面高唱入雲。
熱拿亞半隊主力受傷

熱拿亞自從請得巴拿甸尼執掌教鞭後本來有過風光日子，但近期明顯回落，近3仗只搶得1分，現時排尾4只領先降級區嘅錫耶納兩分，護級勢危。

不過無論巴拿甸尼幾有料，現階段都好難幫到隊波，皆因佢哋嘅傷兵名單水蛇春咁長，最慘仲係傷親都係球隊主力，門將費爾、中場馬度沙林、魯賓奧利華拉同箭頭科路科利斯今晚都因傷缺陣，另外後防大將文費甸尼同首席射手波里路亦受傷患困擾，今晚上陣機會好唔樂觀，人腳天殘地缺，搞到想排一個見得吓人嘅陣容都好難，佢哋上仗主場對AC米蘭，晨早落後兩球，雖然客軍喺中後段時間有干斯坦被逐踢少個，但熱拿亞都攞唔番優勢，今晚殘陣去到費倫天拿嘅狂熱主場更加難踢。

睇番往績，費倫近5次主場對熱拿亞全勝，近4次更保持零失球，熱拿亞上次喺法蘭基球隊贏波已經係37年前嘅事。
Ali 推介：

費倫天拿讓球勝 ★★★★

羅馬大 ★★★

森多利亞平手盤 ★★★