布力般攻「細」難求

猪拉多纳

近6戰5場交白卷

英格蘭足總盃4強戰於周日抽籤，結果曼聯對車路士嘅勝方，將要喺準決賽硬撼曼城，大家無緣見到夢幻決賽之餘，來季英格蘭嘅其中一個歐霸盃席位，亦幾可肯定落喺下線嘅布力般、米禾爾或韋根其中一隊身上，事關無論曼市雙雄抑或車路士，都好大機會以聯賽前5名身份，出席來屆歐洲賽，換言之3隊弱旅之中，邊一隊能夠躋身足總盃決賽，即可以取得來屆歐霸盃入場券。
米禾爾連續3場食白果

由於車路士喺歐霸盃尚未出局，加上下周又係國際賽期，所以對曼聯嘅足總盃重賽遲遲未能訂出比賽日期，反之布力般流浪主場對米禾爾嘅另一場8強重賽，就隨即安排喺今晚進行，兩軍事隔3日再聚首，最大分別之處，就係知道自己過到呢關，再喺4強戰贏埋韋根，來季就可以進軍歐洲，唔使遇到惡爺，點都多一份衝勁，何況雙方都冇乜降班壓力，肯定會全力以赴。

論級數，當然以主隊布力般流浪佔優，話晒上一圈係淘汰阿仙奴，不過佢哋近期火力認真唔掂，近6戰竟有5場交白卷，撞啱客軍米禾爾又連續3場冇波入，與其估邊隊出線，都不如簡簡單單要個1.68倍入球細好過。

（now635台周四凌晨3:30直播）
足球重心：布力般流浪（入球細）、艾斯迪格拿（勝）

馬膽推介：7場(11)帝聖神駒

近期轉戰谷草一哩之後搵到出路，接連取得一冠一亞成績，今仗強配韋達之餘，又冇乜快馬在陣，有機會一放絕塵。