史浩克極速搞掂加拉

猪拉多纳

法芬 米高雙翼齊飛有料到

歐聯16強今晚戰火重燃，史浩克04喺主場迎戰土耳其勁旅加拉塔沙雷，首回合史浩克造訪加拉個地獄球場都唔使輸，踢成1:1平手，照計今場只要唔失波就可以晉級8強。之不過有留意史浩克嘅球迷，都應該睇過佢哋上周末喺「魯爾區打吡」砌低宿敵多蒙特，過程充分反映史浩克嘅決心同狀態係幾咁好，今晚主場出擊有力贏波而回，1.55倍主勝趁熱食。

（有線62、202周三凌晨3:45直播）
亨特拉爾左膝韌帶撕裂

史浩克04近5場波錄得3勝2和，戰績咁好，一對「極速孖寶」絕對居功至偉。今季從里昂來投嘅左翼衞米高巴斯圖斯跑得，右翼嘅法芬就扭得，有佢哋雙翼齊飛都咪話唔得人驚！雖然「獵人」亨特拉爾喺上輪聯賽「領嘢」，賽後證實左膝內側韌帶撕裂起碼要抖3個禮拜，不過史浩克勝在攻擊點夠晒多，根本唔使為佢哋嘅火力問題擔心。
加拉爭取作客入球焗攻

從「魯爾區打吡」所見，法芬同米高巴斯圖斯喺邊路極具威脅，特別係右路嘅法芬，佢同右閘內田篤人默契非常好，兩個入球都係由右路傳中產生。適逢亨特拉爾打咗柴，難得擔正嘅芬蘭箭頭迪姆普基肯定搏命證身價，有佢同「後上殺手」達斯拿衝鋒陷陣，邊使愁冇波入吖？

無疑對手加拉塔沙雷喺1月份得到杜奧巴同史奈達相繼加盟，無論係戰鬥力同歐聯經驗都有所提升，可惜受制於首回合失咗1個作客入球嘅不利形勢，加拉今鋪作客都要焗攻，採取主動在所難免，後場隨時暴露更多空位畀史浩克雙翼法芬、米高巴斯圖斯打反擊，今晚大有機會偷雞唔成蝕把米！

首回合：史客和1:1
加拉歐聯多「半輸」

‧加拉塔沙雷6場歐聯分組賽其中4場「半輸」。

‧史浩克分組賽以3勝3和不敗成績首名晉級。

‧史浩克04最近3場全部開出「半贏全贏」。
史浩克愛搶韁博「半主」

史浩克04首回合落後下扳平加拉塔沙雷1:1後，返到德甲氣勢亦銳不可當，3連勝不特止，仲要係一開波就搶韁，統統開晒「半贏全贏」，相反加拉塔沙雷6場分組賽有4場開出「半輸」，今晚史浩克個「半主」有2.05倍咁好分頭，真係幾抵博o架！