巴塞絕地大反擊

猪拉多纳

紐約司令台遙控炸AC

「地上最強」絕地反擊「大」爆發！今晚歐聯16強次回合矚目大戰，巴塞隆拿主場迎戰AC米蘭，落後兩球嘅巴塞，必定精銳盡出set好炮台，對準AC血肉長城狂轟猛炸，美斯挾住剛破世界紀錄餘威，加埋主帥維蘭路華在紐約遙控指揮，AC喺咁大嘅魯營球場玩死守，猶如自殺，中堅麥薩斯因傷上陣成疑，隨時失吓一粒、失吓又一粒，投X首選入球大。

（有線61及201台周三凌晨3時45分直播）

巴塞上仗聯賽以2比0輕取拉科，刻意收起七名主力，養精蓄銳擺明留力踢呢場生死戰。後備上陣嘅美斯連續十七場聯賽有士哥，並創下世界紀錄，對士氣有正面幫助。雖然主帥維蘭路華仍在紐約醫病，但依然心繫巴塞，佢最近經常用手機直接聯絡教練組，遙控暫代教頭勞拉排兵布陣、臨場調動等，據聞首回合對AC時，維帥曾想透過手機隔空指揮，可惜聖西路球場網絡系統收得太差致未能成功，不過今仗重返接收訊號爆燈嘅魯營球場，又可以「垂簾聽政」。
魯營夠大AC難守

經過一周休息兼上仗大輪換後，巴塞一眾主力如美斯、恩尼斯達、碧基等叉足電，今仗勢必如猛虎出柙，連今季表現差強人意嘅智利翼鋒阿歷斯山齊士近期亦有復甦迹象，或會成為奇兵。巴塞上仗更終止連續十三場失波紀錄，令為人詬病嘅防線重拾信心。球隊現時只有沙維一名傷兵，其位置可由法比加斯代替，由於首回合以0比2落敗，「地上最強」起碼要入到兩粒先有價講，適逢美斯回勇，今仗一定攻到AC氣咳，決心唔使懷疑。

其實AC近況亦唔錯，巴洛迪利來投後七戰未輸過，仲升上聯賽第三位，可惜巴神因資格不符未能喺歐聯披甲，令球隊少咗把尖刀。AC上仗聯賽作客贏熱拿亞，有柏仙尼及麥薩斯先後傷出，據報後者傷勢唔輕，呢位法國中堅首回合演出神勇，係球隊力保不失無名英雄，假若佢真係唔出得，無論用耶比斯定係邦利拿，防守質素必大打折扣。

況且魯營球場零舍大，正所謂久守必失，面對勢兇夾狼嘅巴塞，AC就算鐵心死守都好難捱到尾，如果畀主隊早段攻入，隨時崩潰造就更多士哥，大細中位數雖調至3.5球，大盤仍不容錯過。