格蘭納達有薩冇賠

猪拉多纳

3連敗後喜遇燈神

今輪西甲壓軸上演護級大戰，薩拉戈薩主場火併CF格蘭納達，去到呢啲六分波場合，雙方一定搏甩髀，但衰在薩軍黑過墨斗，近十場未贏過，今仗仲有成籮傷兵，最慘係首席射手普斯迪加啞晒火，面對戰意十足的格蘭納達，要讓波實在離晒大譜，「讓球客勝」值得捧場。

（周二凌晨3時30分開賽）

斯維曾經話薩拉戈薩最識揀波踢，明知對強隊輸梗，索性留力hea踢，等到對同級對手先明刀明槍打真軍，雖然好似冇乜體育精神，但呢招在歇冬前搶到唔少分。
薩拉戈薩傷停嚴重

不過踏入2013年，薩拉戈薩的成績直插谷底，十二場波贏得一場，贏嗰場仲要係西盃賽事，近十場更加未嘗一勝，仲輸足六場，當中更有七場係冇士哥，大家都知薩軍一向靠晒普斯迪加食胡，可惜呢位葡國射手腳風勁唔順，今年只入得兩粒咁大把，表現大跌Watt，直接令球隊每況愈下。

薩拉戈薩傷停問題好嚴重，上仗領紅的荷蘭守將盧雲斯需要服刑，主力羅拔圖占美尼斯、查維阿拿姆、蘇古連尼、艾邦奴亦飽受傷患困擾，後者更係中場輸血管，其擅於作出致命一傳的功架，經常為普斯迪加鋪橋搭路，冇咗佢壓陣，難怪普斯迪加啞晒火喇！

相反格蘭納達自從二月易帥後大有改善，連挫皇馬同拉科之餘，仲打起了前線的洛尼圖同恩哈路，雖然近三仗輸晒，但從過程可見佢哋係力戰而僅敗一粒，並冇輸掉鬥心。依家格蘭納達只係領先薩拉戈薩一分，今仗六分波更加唔可以鬆懈，加上雙方狀態、士氣此消彼長，格蘭納達有得受讓筍到爆，梗係揀「讓球客勝」。