史特加頹爆啃唔落漢堡

猪拉多纳

本周德甲除咗有矚目嘅「魯爾地區打吡」，今晚夜場仲有史特加主場迎擊漢堡，之不過主隊今季喺自己地頭創下「頹爆」紀錄，即使係海鮮味濃嘅漢堡都有力保不敗，1.62倍「讓客」應該走唔甩。

（有線61、64及203周一凌晨0:30直播）
箭頭伊比斯域死火

史特加今季戰績的確令人失望，特別喺主場踢咗11場居然只取得12分，創下球會史上最差嘅德甲主場紀錄，都咪話唔羞家！

另一個大問題係今季聯賽攻入11球嘅伊比斯域「士哥」唔算多，但已經佔咗成隊波超過4成嘅入球，證明班波實在過分依賴呢位波斯尼亞前鋒數胡，好衰唔衰佢近8場先得1球進帳，唔多靠得住，加埋卡卡奧要繼續休戰，想搵食真係凍過水。

漢堡今季海鮮味頗重，既能以4:1大炒多蒙特，但之後又慘負漢諾威1:5，近7場作客亦都只係贏過狀態麻麻嘅「蜜蜂軍團」，面對史特加真係未必開到W，不過佢哋有近3場入2球嘅雲達華治爆發，加上孫弘民就算入波唔多，往往幫手製造唔少具威脅埋門，雙劍合璧嘅話，相信有力搶分而回嘅！