飛腳「讓客」「崎」開得勝

猪拉多纳

火力勁爆 踩場賣特產

夠膽去到人哋地頭擺檔賣特產，大阪飛腳梗係有啲把炮啦，今日佢哋响日乙作客長崎成功丸，贏兩球屬於正常賽果，2.02倍「讓球客勝」唔怕博。

（開賽時間：周日中午12:00）
長崎成功丸靠守搵食

「一年回升日職」係飛腳今季嘅口號，聽落有啲目中無人，但係佢哋有遠藤保仁、今野泰幸、家長昭博以至明神智和呢啲國腳級人馬，其實喺日乙又真係超晒班個喎，抵佢哋咁大口氣嘅。正因為實力強，擁躉又多，飛腳揭幕戰主場對京都不死鳥，有成17,066人入座，對於好多號召力麻麻嘅日乙球隊嚟講，飛腳簡直係票房保證，所以大家都好遷就呢支落難嘅老牌勁旅，好似今日主場嘅長崎成功丸，就畀飛腳响自己擁躉嗰邊嘅看台入口，擺檔賣新款紀念品同以道頓堀命名嘅章魚燒，完全反映飛腳嘅江湖地位。

老實講，飛腳後防唔掂嘅老毛病依然存在，唔係上場點會同京都打成3:3吖，但係佢哋嘅日職級攻擊力响日乙足夠橫行，就算巴西前鋒李安度蒙迪拉唔舒服被收起，都夠晒本錢掃低日乙新丁長崎啦。何況由前國腳高木琢也揸旗嘅成功丸，只得後衞米高占士（新西蘭）、吳昌炫（南韓）兩件外援，級數同飛腳差好遠，佢哋自己知自己事，今季疊埋心水踢「3-4-2-1」防守陣式，呢個禮拜亦狂操班後衞，擺明靠死守搵食，但係對住高成班波嘅飛腳，主場都好難唔輸。