切爾達「大」戰皇馬

猪拉多纳

射手為過英超顯身價

切爾達今晚喺西甲主場對皇家馬德里，1.46倍入球大抵玩。最近切爾達換咗新教練，經已連續兩場開大，首席射手伊亞高艾斯巴斯又有機會跳船去熱刺，肯定會畀心機騷哥利，既然C朗近14場球王上身勁入17球，當然係捧入球大着數。

（now632台周一凌晨2:00直播）

深陷降班危機嘅切爾達，安排上季執教CF格蘭納達嘅尼斯奴做新教頭後，首先喺主場以2:1砌低格蘭納達止血，跟手作客以1:4慘負西維爾，先唔理切爾達能夠終止連盃賽在內連續7場不勝頹勢，係咪格蘭納達球員有心鬆章，最近切爾達球員入波信心回升，相信大家都會贊成。
銀河艦隊新龍門唔夠穩

事實上，切爾達仲有個射手伊亞高艾斯巴斯救命，今季佢已經攻入9個聯賽入球，熱刺表態想用600萬歐元簽佢後，據講切爾達高層只係表面拒絕，實情係只要熱刺肯出1,050萬歐元違約金，就唔會阻伊亞高艾斯巴斯發達，相信佢聽到，肯定會踢得更加落力。大佬，有得去英超，人工隨時倍數上，大家唔使驚伊亞高艾斯巴斯會Hea踢。

另一方面，皇馬喺歐聯淘汰曼聯後，信心返晒嚟，但無論點，「銀河艦隊」新加盟嘅門將迪亞高洛迪古斯，保持清白能力絕對唔及養緊傷嘅卡斯拿斯，加上C朗呢期食番住美斯，個人近14場喪入17球，以佢咩波都要踢嘅性格，今場正選機會好大，更何況佢家陣心情勁靚，日前仲畀狗仔隊影到親自接囝囝放學，切爾達球員可能又會睇佢表演入波騷。
切爾達場場失波

‧兩隊近8次對賽有7次開入球大。

‧皇馬近5場每場至少入2球。

‧切爾達對上3場開半場大。

‧切爾達連續15場有失波。
嫌冇肉食玩半場大

切爾達淪落到要護級，原因當然係防線處於不設防狀態，既然皇馬火力夠強，玩入球大當然係穩陣嘅首選。不過咁，如果大家覺得入球大得1.46倍唔夠吸引，都可以考慮2.02倍嘅半場大，特別係切爾達嘅比賽，已經連續3場半場至少出現2個入球，最近C朗弗得咁緊要，隨時未返更衣室已經𡁻咗兩粒啦！