紐卡素防線中門「大」開

猪拉多纳

今晚英超頭場由紐卡素主場對史篤城，目前只係較降班區多6分嘅「喜鵲」，唔想下季英冠見，嚟緊肯定場場都打甩髀，只可惜佢哋後防實在唔生性，已經連續6場聯賽有失波，撞正專打快速反擊嘅客軍，睇怕又係一場入球騷，2倍「入球大」抵玩呀！

今季英超護級形勢亂過亂世佳人，未計尋晚賽事，由第14位嘅新特蘭到包尾嘅昆士柏流浪只不過係10分差距。7隊波喺呢個護級漩渦中打滾，嚟緊最後10輪賽事，真係每1分都咁重要。近況稍有起色嘅「喜鵲」，自1月尾開始5場英超取得3勝2負，仲贏過車路士，夾埋都搶咗唔少分，但想話真係甩身，根本唔到佢哋放軟手腳。
喜鵲中堅高洛仙尼打柴

好彩，佢哋新買番嚟嗰批球員都好對辦，其中前鋒穆沙施素高已經為球隊入咗3粒波，整體火力逐漸提升，唯一要挑剔係佢哋入得又失得，後防仲要冇埋主力高洛仙尼，隨時前面入埋唔夠後面輸。
史篤城連續9場有失波

史篤城方面，近況相當唔掂，踏入2013年喺各項賽事共11場賽事只係贏過1場，依家喺英超已經跌到落第11位，而且已經連續9場有失波，相信今晚作客紐卡素又係會畀人狂攻，失波只係時間問題，兩隊都係入得又失得，等我今晚買番包大薯片睇入波騷啦！
Yennie推介：紐卡素入球大

3●20《球彩俱樂部》見

我由銀行業轉行到保險界，到依家仲做埋財務策劃顧問，我深信呢個決定絕對係冇錯嘅！我好鍾意依家份工，除咗可以幫到人之餘，彈性嘅工作時間亦都容許我繼續做番自己有興趣嘅嘢。3月份開始我會喺有線球彩台嘅《球彩俱樂部》度做節目主持，為大家講波！嚟緊3月20號晚就會見到我喇，大家記得多多支持呀！
Yennie

大學畢業後再戰模特兒界，憑住甜美笑容和豐滿身材，過去半年湧現不同類型的工作。