寸王教波大把嘢學

猪拉多纳

歐聯16強次回重頭戲曼聯對皇家馬德里，相信好多球迷都有捱眼瞓睇直播，Peter覺得「紅魔鬼」喺主場輸波，同費爵爺冇畀朗尼打正選及拿尼食紅牌離場成為關鍵。但正所謂成王敗寇，皇馬晉級係鐵一般事實，任由你點講都冇法改變。其實皇馬能夠攞到8強席位，教練莫連奴可謂居功至偉。Peter認為莫連奴的確係世界頂級大師，喺比賽前中後嘅處理方法都好值得各位教練或領隊去學習。

於「魔皇」賽前，莫連奴少有地少說話，就算有嘢講都係為球員減壓為主，比如「輸波唔係世界沒日」、「皇馬唔需靠歐聯證明實力」、「奧脫福氣勢強」等等……總之要令皇馬球員以最平靜心態應付大戰。
減壓大法×神級調配

去到比賽途中曼聯拿尼攞紅出場，莫連奴知道機會來臨了，即刻收起後衞艾比路亞，換入侵略性嘅莫迪歷搏殺，克國中場果然憑一腳世界波追平；及後C朗入多球後，莫連奴就用手長腳長嘅比比入替奧斯爾，穩住整個中後場。從兩個調配你就睇到莫連奴係一個當機立斷嘅人，亦好識把握機會。

比賽末段其實大局已定，莫連奴並未有等吹完場雞就提早返更衣室等球員。大家都知莫連奴曾經做過車仔主帥，佢好了解曼聯脾性，知道紅牌及出局兩大要素，肯定會激怒曼聯所有人。莫連奴唔想生事，提早離場絕對明智兼具大將之風。反正皇馬都達成目標，乜彩都畀佢哋攞晒，無謂再喺奧脫福球場耀武揚威。只係一場比賽已體驗到莫連奴嘅執教功力，簡直係活生生嘅教練textbook。

金句：晉級論英雄