3D大激鬥利熱有睇頭

猪拉多纳

明明上周四深夜先睇完熱刺點樣大發神威，狂數國米！點知一覺瞓醒就見到利物浦個初盤開咗，居然要讓熱刺半一，真係難以置信！有口痕朋友就話呢個係反間計，等啲球迷以為熱刺抵買，呢個陰謀論真真假假太難定奪，小妹都係簡簡單單推介入球大。

熱刺今季愈戰愈勇，同上季愈踢愈沉啱啱調轉，保亞斯都開始得到正評。以近期表現無論係英超或歐霸計，熱刺都保持銳勇，當中加里夫巴利當然係居功至偉，佢喺近8場比賽有7場都有波入，威到返去家鄉威爾斯！佢移入中路後表現愈踢愈好，連帶其他隊友如基菲爾施古臣有更多空間活動！快攻係熱刺一大殺着之外，高波亦有後上嘅維頓漢等極具威脅。
紅軍讓到半一難理解

利物浦要讓到半一真係好難理解，雖然利記最近幾場都大勝而回，但主場對住狀態甚佳嘅熱刺真係咁有計？至少近兩季喺晏菲路都贏唔到對手！投X利記生活又難估好唔好，不過入球大就比較有把握，因為單天保至尊嘅蘇亞雷斯持續強勁，上場連中三元後更進佔射手榜首位，以佢卡士大家都唔會對利記入波能力有懷疑，今場勝負難料，揀入球大最好，加埋今晚有線仲有3D直播，一齊睇立體好波。

（有線300、200及204台周一凌晨零時直播）