歐洲莊家睇好西里安斯卡

猪拉多纳

進入三月，歐洲主流聯賽都去到最後直路階段，唔少人都會有個理論，話呢段時間賽果會正路好多，Deal兄大膽咁同大家講，咪咁一廂情願啦，一年365日，日日都要食飯，使唔使搵食先，正所謂蛇有蛇路、鼠有鼠路，喺球賽搵食嘅，日日都會搵機會，只不過係大咬定係細嗒咁解啫。

今日同大家傾傾瑞典盃西里安斯卡主場對咸史達斯，其實呢場係32強分組賽，同日仲有九場，不過香港馬會足智彩就選擇只開呢場畀大家賭。講開選擇性開盤，Deal兄有樣嘢想大家知，雖然好多歐洲菠菜公司都有為瑞典盃開盤，但係好多外圍都唔敢開早餐盤，相反月底先開咧嘅瑞典超就已經開晒盤，呢種情況話畀大家知，呢個盃確係有好多不明朗因素，連外圍莊家都要睇定啲先敢郁手。

如果大家記性唔差嘅，應該記得調查歐洲假波案嘅主管講過，要喺東歐搵個低薪嘅球員造假波好易，其實呢個情況又點只係東歐吖，北歐呢幾年都受到歐債危機影響，唔少球會都有財政問題，拖糧、賣球員套現新聞無日無之，只不過香港好少報道啫。
足智彩獨家撐咸史達斯

足智彩呢場夠膽開盤，比起更多外圍更進取，只不過咁，Deal兄比較過歐洲多間菠菜公司主客和賠率，唔係吹水，手頭上望過近90間歐洲莊家開嘅盤，都係西里安斯卡個W熱，主和客賠率約係2.30倍、3.25倍同2.65倍，足智彩全球獨家咸史達斯客Ｗ較熱，究竟係足智彩開錯盤，定係獨具慧眼有獨家料呢？純以賠率計，歐洲莊家均睇好西里安斯卡，既然喺足智彩投X有着數，玩番少少無妨。