巴塞「科」騷壯歐聯行色

猪拉多纳

今周西甲由兩位「1哥」對決，由榜首嘅巴塞隆拿喺魯營迎擊包尾大幡拉科魯尼亞，呢場亦係西甲最強鋒力對最差防守之戰。雖則話嚟緊周中有歐聯後顧之憂，但拉科嘅實力始終差一大橛，而且近4戰輸咗3場嘅「地上最強」又要用入波嚟回應近期外界嘅批評，一場大屠殺睇怕在所難免，就算「-2」照撐1.74倍「讓主」。

（now632台周日凌晨3:00直播）

巴塞接連輸畀AC米蘭同皇馬，突然間「Tiki Taka」打法好似到咗末日咁，唔少人質疑佢哋進攻魔力不再。無可否認巴塞踢法已經畀人搵到弱點，但搵到同守到係兩回事！尤其今仗對手拉科係西甲失球最多球隊，26戰失咗56球，想佢哋阻擋「地上最強」，又似乎不切實際。
柏度洛迪古斯復出

或者大家諗住巴塞會留力嚟緊周中歐聯16強次回合對AC，而唔多重視呢場波，但雷法爾又唔係咁睇，既然巴塞下場要大勝「紅黑兵團」先可以喺歐聯晉級，但有咩好得過今晚寓賽於操，既可以打番起球員信心，又可以用實際行動反擊外界批評。雖然剛啱復操嘅中場沙維休戰，但陣中仍有法比加斯、恩尼斯達等發電機，前線仲要又有柏度洛迪古斯復出，想大勝一場振軍心唔難。
拉科防守力西甲最差

至於「倒數1哥」拉科今季立立亂，儘管已3度易帥但作用始終唔大，新教頭華斯基斯領軍以嚟亦只得1和2負成績，同護級安全線仲有成8分差距。事實上，防守力差係拉科死穴，最慘係今場仲有首席射手里基、守將薛卡斯度同哥迪安奴卡卡養傷，就連經驗豐富嘅後衞馬真拿亦要停賽，難為中場華拿朗仲話要趁巴塞病攞佢命，不如佢擔心吓自己先係隻待宰羔羊啦！